విపశ్యన ధ్యానము

విపశ్యన అంటే వాస్తవంగా ఉన్నది ఉన్నట్లుగా చూడటం. విపశ్యన ధ్యానం భారతదేశం యొక్క అత్యంత పురాతన పద్ధతులలో ఒకటి. దాదాపు 2500 సంవత్సరాల క్రితం గౌతమ బుద్ధుడు దీనిని తిరిగి కనుగొని సమస్త దు:ఖాలకు సార్వజనీనమైన నివారణ మార్గంగా అందరికీ అందించారు అంటే ఒక  జీవన కళ ఈ సార్వజనీనమైన ప్రక్రియ మనస్సులోని వికారాలను సమూలంగా నిర్మూలించి తద్వారా సంపూర్ణ విముక్తి వలన లభించే పరమానందాన్ని కలుగజేస్తుంది. నిర్మూలనమంటే, కేవలం వ్యాధి నిరోధమే కాకుండా సంపూర్ణ మానవ దు:ఖ నిర్మూలనమే దీని లక్ష్యము.

విపశ్యన స్వీయ పరిశీలన ద్వారా స్వీయ పరివర్తన కలిగించే మార్గం. ఇది శరీరానికి మనస్సుకు ఉన్న లోతైన సంబంధాన్ని తెలియజేస్తుంది. ఈ సంబంధాన్ని ప్రతి ఒక్కరు ప్రత్యక్షంగా అనుభవపూర్వకంగా శారీరిక సంవేదనలపై నియమబద్ద ధ్యాస ద్వారా తెలుసుకోవచ్చు. ఈ సంవేదనలు శరీరానికి, మనస్సుకు జీవమిస్తూ నిరంతరంగా పరస్పర సంబంధాన్ని మరియు నియంత్రణను కలుగజేస్తూ ఉంటాయి. శరీరము మరియు మనస్సుల యొక్క మూలమూలకు చేర్చే ఈ పరిశీలన ఆధారిత, స్వీయ అన్వేషణా మార్గమే మానసిక వికారాలను తొలగించి, ప్రేమ మరియు దయతో నిండిన సమతుల్యమైన మనస్సును కలిగిస్తుంది.

ఒకరి ఆలోచనలు, భావాలు, తీర్పులను మరియు సంవేదనలను ప్రభావితం చేసే వైజ్ఞానిక నియమాలు స్పష్టమవుతాయి. ప్రత్యక్ష అనుభవం ద్వారా, ఒకరు ఎలా ప్రగతి చెందుతారో లేదా తిరోగామిస్తారో, ఎలా దు:ఖాన్ని జనింపజేస్తారో లేక దు:ఖం నుండి తమను తాము విముక్తి కలిగించుకోగలరో అన్న ధర్మములు అవగతమవుతాయి. జీవితంలో అవగాహన పెరుగుతుంది, భ్రాంతి తొలగుతుంది, స్వీయ-నియంత్రణ మరియు శాంతి అభివృద్ధి చెందుతాయి.

సాంప్రదాయము

బుద్ధుని కాలం నుండి ఇప్పటివరకు , విపశ్యన ధ్యాన పద్ధతిని గురు శిష్య పరంపర ద్వారా కాపాడి మనకు అందజేసారు. ప్రస్తుత ఆచార్యలు శ్రీ సత్యనారాయణ గోయెంక గారి పూర్వీకులు భారత సంతతికి చెందిన వారే అయినా వారి జననం మరియు పెంపకం మాత్రం బర్మా (మయన్మార్) లో జరిగింది. అక్కడ నివసిస్తున్న సమయంలో ఉత్తమ ప్రభుత్వ అధికార పదవిలో ఉన్న తన గురువు, సాయగ్యి ఉ బా ఖిన్ గారి నుండి విపశ్యనను నేర్చుకునే అదృష్టం కలిగింది. పద్నాలుగు సంవత్సరాలు తన గురువు నుండి శిక్షణ పొందిన తరువాత, గోయెంకా గారు భారతదేశం లో స్థిరపడ్డారు మరియు 1969 లో విపశ్యన బోధించడం ప్రారంభించాడు. అప్పటి నుండి వారు తూర్పు మరియు పాశ్చాత్య దేశాలలోని అన్ని జాతులు మరియు అన్ని మతాల ప్రజలకు వేలాదిమందికి బోధించారు. విపశ్యన శిబిరంలకు డిమాండ్ పెరుగుతున్నందున 1982 లో వారు సహాయక ఆచార్యులను నియామించడం ప్రారంభించారు.

శిబిరాలు

ఈ ధ్యాన పధ్ధతి పది రోజుల స్థానిక శివిరములలొ నేర్పబడుతుంది. సాధకులు క్రమశిక్షణ సూచికను పాటిస్తూ ఈ ధ్యానము యొక్క మూల పద్ధతిని నేర్చుకుని తగినంతగా సాధన చేసినచో చక్కటి ప్రయోజనాలను అనుభవించగలరు.

శిబిరంలో కఠినమైన, గంభీరమైన సాధన చేయవలసి ఉంటుంది. శిక్షణలో మూడు దశలు ఉన్నాయి. మొదటి దశ, శిబిరం పూర్తయ్యేవరకు హింస,దొంగతనం, లైంగిక సంపర్కం, అసత్య భాషణం మరియు మత్తు పదార్థాల సేవనం నుండి దూరంగా ఉండాలి. ఈ సరళమైన నైతిక విలువలు మనస్సుని శాంత పరచడంలో ఎంతో దోహదపడతాయి లేకపోతే మనస్సు ఎంతో ఆందోళనగా, చంచలంగా ఉండి స్వీయ పరిశీలనలో ఇబ్బందులు కలుగుతాయి. తదుపరి దశలో ముక్కు రంధ్రములలోంచి సహజ సిద్ధంగా వచ్చి వెళ్ళే నిరంతర మార్పు గల శ్వాస మీద తమ మనస్సును కేంద్రీకరించి, మనస్సు మీద పటుత్వాన్ని సాధించే అభ్యాసం ఉంటుంది. నాలుగో రోజుకు చేరే సరికి మనస్సు శాంతబడి, కేంద్రీకృతమై విపశ్యన సాధనకు అనుకూలంగా మారుతుంది. శరీరం అంతటా కలిగే సంవేదనలను గమనించడం, వాటి స్వభావాలను అర్థం చేసుకోవడం మరియు ప్రతిక్రియ చేయకుండా సమతను పెంపొందించుకోవడం ఇవన్నీ విపశ్యన సాధనలో భాగమే. చివరగా, అంతిమ రోజున సాధకులు మైత్రి అనే ఒక కొత్త ధ్యాన పద్ధతిని నేర్చుకుంటారు. మైత్రి అభ్యాసం ద్వారా ఈ శిబిరంలో సంపాదించిన పుణ్యమును అందరికీ వితరణ చేయడం జరుగుతుంది.

ఈ సమస్త ఆచరణ అంతా నిజానికి ఒక మానసిక శిక్షణయే. శరీర ఆరోగ్యాన్ని మెరుగుపరిచేందుకు శారీరక వ్యాయామాలు చేసినట్లే ఆరోగ్యకరమైన మనస్సును అభివృద్ధి చేసుకోవడానికి విపశ్యన సాధన చేయవచ్చు.

ఈ విద్య ఎంతో ఉపయోగకరమైనదని రుజువైనందున దీనిని శుద్ధ రూపంలో పరిరక్షించడానికి అత్యంత ప్రాముఖ్యత ఇవ్వబడుచున్నది. ఇది వాణిజ్య పరంగా కాకుండా ఉచితంగా బోధించబడుచున్నది. దీనిని నేర్పుతున్న వారు అందరూ కూడా ఎటువంటి భౌతిక లాభాపేక్ష లేకుండానే సేవలు అందిస్తారు. శిబిరాలకు ఎలాంటి రుసుము కట్టనవసరం లేదు. - ఆహార మరియు వసతి ఖర్చులు కూడా ఏవీ ఉండవు. అన్ని ఖర్చులు శిబిరం పూర్తి చేసి విపశ్యన యొక్క ప్రయోజనాలు అనుభవించి, ఇతరులు కూడా అదేవిధంగా దీని నుండి లాభం పొందాలన్న ఉద్దేశ్యంతో ఇచ్చిన విరాళాల ద్వారానే నెరవేర్చబడును.

శిబిరం యొక్క ఫలితాలు నిరంతర సాధన ద్వారా క్రమంగా వస్తాయి. అన్ని సమస్యలు పది రోజులలోనే పరిష్కరించబడాలని అనుకోవడం అత్యాశే అవుతుంది. అయితే, ఈ పది రోజులలో విపశ్యన యొక్క ముఖ్య సాధనా పద్ధతిని నేర్చుకుని తమ నిత్య జీవితంలో పాటించగలరు. ఎంత ఎక్కువ సాధన చేస్తే అంత దు:ఖ విముక్తి కలుగుతుంది, మరియు ముక్తి మార్గంలో అంతే ముందుకు వెళ్ళగలరు. ఈ పది రోజులలో కూడా రోజువారీ జీవితంలో ఖచ్చితంగా ఉపయోగకరమైన స్పష్టమైన సత్ఫలితాలను పొందవచ్చు.

నిజాయితీ పరులైన వారందరినీ విపశ్యన శివిరములలో పాల్గొనడానికి స్వాగతిస్తున్నాము. ఈ శిబిరంలో పాల్గొని ఈ పధ్ధతి ఎలా పనిచేస్తుంది మరియు దాని లాభాలను ఎలా గణించగలము అనే విషయాలను మీరు స్వయంగా అనుభవపూర్వకంగా తెలుసుకోగలరు. దీనిని సాధన చేసిన ప్రతి ఒక్కరూ కూడా నిజమైన సుఖాన్ని పొందడానికి మరియు ఇతరులతో పంచుకోవడానికి ఇది ఒక అమూల్యమైన ఉపకరణము అన్న విషయాన్ని స్పష్టంగా అర్థం చేసుకోగలరు.